მატჩის პირველი ტაიმი ქართველებმა ხვიჩა კვარაცხელიას მიერ მოპოვებული და გატანილი პენალტით 1:0 მოიგეს. მეორე ტაიმში გიორგი ჩაკვეტაძემ ორი ბურთამდე გაზარდა სხვაობა, ხოლო გიორგი მიქაუტაძემ კიდევ ერთი გოლი გაიტანა და ულამაზესი შესრულებით გუნდი წინ 3:0 გაიყვანა. 66-ე წუთზე გიორგი ჩაკვეტაძის ზუსტი პასით ლუკა ქოჩორაშვილმა თავური დარტყმით 4:0 გახადა ანგარიში. ჩეხებმა მატჩის 80-ე წუთზე ერთი გოლი გაქვითეს, როცა ლუკას კალვაჩმა გიორგი მამარდაშვილის მოგერიებულ ბურთს დაამატა და მატჩის საბოლოო ანგარიში 4:1 დააფიქსირა.
მატჩის დაწყებამდე, ქართველი ოლიმპიელები და პარაოლიმპიელი მედალოსნები სიმბოლურად ეროვნული ნაკრების ფორმით დააჯილდოვეს. გარდა ამისა, გიორგი მიქაუტაძეს გადაეცა ევროპის ჩემპიონატის თანაბომბარდირის ტიტულისთვის განკუთვნილი სპეციალური პრიზი.
მატჩის შემდეგ მწვრთნელების კომენტარი:
ივან ჰაშეკი (ჩეხეთი): “შედეგი ყველაფერს ნათლად აჩვენებს. დღევანდელი ჩვენი თამაშით კმაყოფილი ვერ ვიქნები. გულდაწყვეტილი ვარ, რადგან ამ შედეგს არ ველოდი. საქართველოს ნაკრებმა აშკარად გვაჯობა, მათი თამაში მობილიზებული და აგრესიული იყო. ჩვენ თავიდანვე სხვანაირი განწყობით გავედით მოედანზე, რამაც საბოლოო შედეგზე გავლენა იქონია. იმედი მაქვს, დაშვებულ შეცდომებს უკრაინასთან შეხვედრამდე გამოვასწორებთ და უკეთეს თამაშს ვაჩვენებთ. გულშემატკივართა ძლიერი მხარდაჭერა იგრძნობოდა, რაც საქართველოში ფეხბურთის განსაკუთრებულ სიყვარულს უსვამს ხაზს,”
ვილი სანიოლი (საქართველო): “ჩვენი გუნდი ამ წარმატებამდე დიდი გზის გავლით მოვიდა. ბევრი რამ შეიცვალა უკეთესობისკენ, დღეს მოედანზე გამოვიდნენ ფეხბურთელები, რომლებსაც ევროპის ჩემპიონატზე აქვთ ნათამაშები და შესაბამისად, უფრო თავდაჯერებულები იყვნენ. ძალიან მაინტერესებდა, როგორ გამოვიდოდით ევროპის ჩემპიონატის შემდეგ და ნამდვილად ფანტასტიკური თამაში ვიხილეთ. რაც შეეხება კვარაცხელიას შეცვლას, ხვიჩა მაღალი დონის მოთამაშეა და მას ხშირად უწევს 3 დღეში ერთხელ თამაში. დღეს 90 წუთი სრულად ითამაშა. კიტეიშვილი, რომელიც ტრავმიდან დაბრუნდა, უკვე დაგეგმილად შევცვალე. კიტეიშვილი ევროპის ფეხბურთის ერთ-ერთი ყველაზე დაუფასებელი მოთამაშეა, რომელსაც ტოპ გუნდებში თამაში თავისუფლად შეუძლია. ევროპის ჩემპიონატზე ჩეხეთთან ის გვაკლდა და ეს დიდი დანაკლისი იყო. მიხარია, რომ გუნდში მისნაირი მოთამაშე მყავს, რომელიც ყველა დავალებას იდეალურად ასრულებს,” – განაცხადა სანიოლმა.
საქართველოს ნაკრები მომდევნო შეხვედრას 10 სექტემბერს, სტუმრად, ალბანეთის ნაკრებთან გამართავს.
