მოგეხსენებათ, ქუთაისის "აიამ" დიდი 10 -ის რეგულარული ჩემპიონატი მეორე ადგილზე დაასრულა. მცირე ფინალში კი პირველ ადგილზე გასული "ლელო" თბილისში 27:10 დაამარცხა და ორი კვირით ადრე გაინაღდა დიდ ფინალში ასპარეზობა.
თავის მხრივ "ლელომ" წინასწარ ფინალში, დაძაბული  შეხვედრა22:19 მოუგო "ყოჩებს" და საჩემპიონო ბრძოლაში სწორედ ის იქნება "აიას" მეტოქე.
ქუთათურები გადამწყვეტი მატჩისთვის დიდი შემართებით ემზადებიან და გულშემატკივრებს ბოლომდე ბრძოლას ჰპირდებიან.
გიორგი ბაბუნაშვილი: " გუნდში საბრძოლო განწყობაა, სეზონის მთავარი მატჩისთვის 100% ით მზად ვართ. პატარ-პატარა ტრავმები გვაქვს, მაგრამ ეს ხელს ვერ შეგვიშლის, იმედი მაქვს, რომ ფინალისთვის ყველა ბოლომდე მწყობრში იქნება. მაქსიმალურად შევეცდებით, მეტოქეს ჩვენი თამაში მოვახვიოთ თავს და ფინალში გამარჯვება მოვიპოვოთ!
"ლელო" საკმაოდ კარგი და მებრძოლი გუნდია, რეგულარულ სეზონში მათთან ორი მატჩი წავაგეთ, თუმცა მცირე ფინალში მოვახერხეთ მათი დამარცხება და შედარებით ადრე მოვიპოვეთ ფინალის საგზური. "ლელომ" "ყოჩებს" მოუგო და გადამწყვეტი მატჩის ჩატარება ისევ მათთან გვიწევს.
წინ მნიშვნელოვანი თამაში გველოდება. ფინალი ყოველთვის ემოციებთან და დაძაბულობასთან არის დაკავშირებული. მაქსიმალურად ვეცდებით, რომ საჩემპიონო თასი ქუთაისში ჩამოვიტანოთ!  
გიორგი ფრუიძე: " არაჩვეულებრივი განწყობა გვაქვს. ბიჭები ფინალისთვის მოტივირებულები ვართ. ვეცდებით, რომ ჩვენი კარგი თამაშითა და გამარჯვებით გავახაროთ ქუთათურები!
რა თქმა უნდა, კარგი იქნებოდა ფინალი ქუთაისში გამართულიყო, რადგანაც პირველი ფინალისტები ვართ და მცირე ფინალის გამარჯვებულები, მაგრამ  ჯერ კიდევ სეზონის წინ  გადაწყდა ფინალის თბილისში ჩატარება. ეს ბევრს არაფერს არ შეცვლის, რადგანაც ქუთაისიდან ბევრი გულშემატკივარი მოდის ჩვენს საქომაგოდ. ჩვენც ყველაფერს გავაკეთებთ, რომ მათი იმედები გავამართლოთ და საჩემპიონო თასი ქუთაისში ჩამოვიტანოთ!